【轮证赢家】国庆前会维稳吗?

【轮证赢家】国庆前会维稳吗?放大图片

9点40分返到公司就见到新闻组同事开住个电视机等林郑出嚟讲话,其实星期四(9月26日)都有佢首场「与公众对话」啦,仲有咩好讲呢?(呢句嘢可能係大家最想同佢讲嘅一堆说话其中一句)

预佢例迟,都係转返去财经台先,见依家9点42分时恒指做26241点,升19点,暂呈高开低收;而噚日手痕向个股埋手,睇中咗只港交所(00388),喺噚日下昼1点30分至1点45分,SlowSTC(14,3)再次落返去超卖时,基于见佢朝早走势怪怪的咁,所以喺注码上控制以图减轻落场压力。喺嗰阵时(62690)高低位做过$0.093/$0.085,平均买入价就係$0.089。

可能就正正注码细,一心谂住等收市再等收工,谁不知喺3点时恒指无啦啦发威,再望望港交所,喺3点10分开始嚟料,见佢5分钟图上SlowSTC(14,3)开始踏入「8」字头见超买,心谂再比多少少时间佢,睇吓会唔会上到「9」字头先,等到3点半, %K线终于见「9」字,于是就放走只(62690)。其实喺下昼3点至3点40分呢段时间,港交所嘅5分钟图SlowSTC(14,3)都係见「8」字头以上超买位,按呢段时间嘅高低位$0.109/$0.095计,平均卖出价就係$0.102,对比之前买入价,day trade赚幅14.6%。「係咪早知就大注啲呢?」又唔好咁讲,注码大细都係策略嘅一种,细注啲无咁大压力时,你做嘅决定都会有信心/準确啲。

依家10点6分,恒指做紧26300点,升77点,回复返今朝开市时个水平,日线图见暂呈「十字星」,而成粒烛今日就处于保历加下降通道裏面,SLowSTC(14,3)两线仍然向下,不过见保历加通道口有开始收窄之嫌,且见14RSI见回升,似乎恒指六连跌之后都未必想直插落保历加通道底(25359点)度,前面新闻组同事提醒我:「一阵间有个国庆记者会,会做埋直播...」係喎,今日9月24号,仲有一个星期就「10‧1」国庆日啦喎,即係又有假放啦喎,又即係话「维稳」又开始嚟料啦喎,怪不得10点16分抬头望望电视机,恒指无啦啦发力升140点,做紧26363点啦。

开埋恒指牛熊证街货图,依家见上方熊证仍然係26900至26999点为最近街货层,亦都係重货区,呢度有相当于1141张期指,虽然係好耐无见嘅过千张期指街货,但同现价比都真係仲有啲距离。

始终现价同下方牛证行得埋啲,26100至26199点就已经係最贴价嘅第一层牛证,呢度有相当于408张期指,数量真係唔算多;但经过今日稍升之后,会唔会吸引更多资金做好仓?都真係唔排除呢个可能性。而牛熊中间位(26900+26199)/2=26549.5,同头先mark底嘅价26363点,只係相差186.5点,on top加返头先mark低埋嘅升幅140点,讲紧假设今日个市升326.5点嘅话,就会上到牛熊证中间位,呢个点数唔算多但又起到看似「维稳」作用,何乐而不为呢?

不过,对于落场嚟讲,上方远但重货,下方近但少货,上牛熊中间位又唔难,咁多个可能性会发生嘅情况之下,选择做旁观者就算。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:【轮证赢家】国庆前会维稳吗?[email protected];FB:轮证赢家

放大图片

上一篇:
下一篇: